నేడు ఉమెన్స్ క్రికెట్ వరల్డ్ కప్ స్పెషల్ అట్రాక్షన్
హైదరాబాద్, నవంబర్ 02 (ఇయ్యాల తెలంగాణ) : ఆమె పురుషుల క్రికెటర్ల మాదిరిగా బైటికి కనిపించదు. పురుష క్రికెటర్ల వలె వ్యాపార ప్రకటనల్లో అగుపించదు. ఎన్ని బాధలు వచ్చినా విలపించదు. మరెన్ని ఆరోపణలు తనపై వచ్చినా తొణకదు, ఇంకెంతమంది కామెంటటర్లు క్రికెట్లో పరుగులు రాబట్టడం లేదని విమర్శలు చేసినా వణకదు,బెణ కదు. మతపరంగా పరోక్షంగా దాడిచేసినా చలించదు. ఇన్నివిధాలుగా తట్టుకుని నిలబడ్డ క్రీడాకారిణి ఎవరయ్యా అంటే భారత మహిళల క్రికెట్ జట్టు సభ్యురాలు జెమీమా రోడ్రిగ్స్. మొన్న మహిళల క్రికెట్ ప్రపంచ కప్ లో భారత్ – ఆస్ట్రేలియాతో జరిగిన రెండో సెమీ ఫైనల్ లో విరవిహారం చేసి ఫైనల్ కు చేర్చిన జెమీమా ఆట తీరును చూసిన వారెవరికైనా ఆమెపై గతంలో ఆరోపణలు చేసిన విమర్శకులకు సరైన సమాధానం చెప్పింది. తాను దేశానికి ప్రాతినిధ్యం వహిస్తున్నానని మత చాందస వాదులకు బ్యాటుతో గుణపాఠం నేర్పింది. తప్పక గెలిచి తీరాల్సిన మ్యాచులో ఆస్ట్రేలియాతో భారత్ తరపున చివరికంటా పోరాడి గెలిపించిన తీరు అమోఘం, అద్వితీయం. పురుష క్రెకెటర్లు కూడా ఔరా అంటూ ఆశ్చర్యచకితులై జెమీమాను అభినందించక తప్పలేదు. మరపురాని ఆ ఒకే ఒక ఇన్నింగ్స్ భారత మహిళా క్రికెట్ లో తనకంటూ ఓ స్థానాన్ని సుస్థిరం చేసుకుంది. ఈ మహిళా ప్రపంచకప్ కు ముందు ఇంకా చెప్పాలంటే ఆస్ట్రేలియాతో సెమీఫైనల్ కు కొంచెం ముందుదాకా కూడా జెమీమా రోడ్రిగ్స్ అనుభవించిన మానసికవేదన అంతా ఇంతా కాదు. ఈ మహిళా ప్రపంచ కప్ లో మొదటఆడిన నాలుగు మ్యాచుల్లో రెండుసార్లు సున్నా కే అవుటవ్వగా రెండుమార్లు ముప్పై పరుగుల లోపే ఔట్ అయ్యారు.
ఇంకేముంది తెలిసిందే ఫామ్ లో లేదని ఇటు ఆరోపణలు అటు విమర్శకుల దాడికి లోబడి ఇంగ్లాండ్ తో జరిగిన మ్యాచులో జె మీమాను పెవిలియన్ కు పరిమితం చేశారు. పైగా పెవిలియన్ లో కూర్చున్న కూడా మత చాందవాదులు, ఆమెకు తన మతానికే ప్రాధాన్యత నిస్తుందని ఇతరములైన విషయాల పట్ల ఆసక్తి చూపిస్తుంటుందని కారుకూతలు కూశారు. అవన్నీ వింటూ చూస్తూ ఒకింత బాధ అయినా చలించలేదు. అవకాశం వస్తే మహిళా ప్రపంచ కప్ లో శక్తియుక్తులు ధారపోసైనా దేశాన్ని గెలిపించాలని పట్టుదలతో స్థిరంగా ఉన్నది. ఆడలేని వాళ్ళని తీసేయాల్సిందిగా సోషల్ మీడియాలోనైతే విమర్శకులు ఘాటుగా స్పందించారు. ఇంతకు ముందు న్యూజిలాండ్ ఆతిధ్య మిచ్చిన వన్ డే మహిళా ప్రపంచకప్ జట్టులో జెమీమాకు అసలు సెలెక్టర్లు చోటివ్వలేదు. అప్పుడు కూడా వెనకడుగు వేయక ఆత్మ స్థైర్యం కోల్పోలేదు. న్యూజిల్యాండ్ నుంచీ తిరిగి వచ్చినా పిదప కూడా భారత మహిళా క్రికెట్ జట్టుకు ఎంపిక కాలేకపోయింది. ఎందుకంటే ముంబై ఖార్ జింఖానా క్లబ్ లో జెమీమా రోడ్రిగ్స్ తండ్రి ఇవాన్ క్రైస్తవ మత ప్రచారం చేస్తున్నాడని తీవ్ర విమర్శలు వచ్చాయి. దీనితో మూలిగే నక్కపై తాటిపండు పడ్డట్లుగా జెమీమా పరిస్థితి ఎదుర్కొన్నది. మత మౌడ్యుల ప్రోద్బలం ఒత్తిడి ఈ సాకుతోనే ఖార్ జింఖానా మేనేజ్ మెంట్ ఆ క్రికెట్ క్లబ్బులో జెమీమా సభ్యత్వాన్ని రద్దు చేసింది.
ఎన్ని విధాలుగా అణచాలో అన్ని ప్రయత్నాలు ప్రయోగాలు చేసారు. అసలే భారత మహిళా క్రికెట్ జట్టులో స్థానం కోల్పోయిన ఉన్న జెమీమా ఈ పరిణామాలు కొద్దిగా శాశ్వతంగా మాత్రం ఆమెను బాధపెట్టలేక పోయాయి, ఆటనుంచి దూరం చేయలేకపోయాయి. ఆట పై శ్రద్ధాశక్తులు కనబరిచి దేశవాళి క్రికెట్ ను ఆసరాతో పరుగులు రాబట్టడంతో మళ్ళీ ఈ మహిళా ప్రపంచకప్ కు ఎంపికైంది. కానీ రెండుసార్లు సున్నా పరుగులకే వెను తిరగడంమరో రెండుసార్లు తక్కువ పరుగులకే అవుటవ్వడంతో మళ్ళీ విమర్శకులు నోళ్లకు పదునుబెట్టారు. ఈసారి వచ్చిన ఆరోపణలు పట్టించుకోకుండా బ్యాటుతోనె సమాధానం చెప్పాలనీ బాధ్యతగా వ్యవహరించాలనుకుని తనకుతాను మనసులో కర్తవ్యం దీక్షతో ముందుకు సాగింది. అందులో భాగంగానే న్యూజిలాండ్ తో జరిగిన మ్యాచ్ లో తానే అజేయంగా మంచి స్కోరు సాధించి ఆరోపణలు చేసేవారికి బదులిచ్చిoది. ఇదే అదనుగా ఏడు సార్లు ఛాంపియన్ అయినా ఆస్ట్రేలియతో రెండో సెమీ ఫైనల్ మ్యాచులో చెలరేగి పోయింది. రికార్డు లక్ష్య చేదనలో స్మృతి మంధాన, షెఫాలి లు తొందరగా అవుటవ్వడంతో భారత మహిళల జట్టు గెలుపుపై అభిమానులకు అనుమానాలు పెనవేసుకున్నాయి.
అయితే ఇక్కడ ఒక్కటే జెమీమా మనసులో అనుకుంది ఎలాగైనా గెలిపించి ఫైనల్ కప్పు పోటీలో నిలవాలని కెప్టెన్ హర్మన్ ప్రీత్ కౌర్ తోడుగ ఆకాశమే హద్దుగా పరుగుల కొరకు చెలరేగి పోయింది. కీలక సమయంలో హర్మన్ నిష్క్రమించిన కూడా జెమీమా ఏమాత్రం సంకోచించలేదు. రిచా ఘోష్, దీప్తి శర్మ, అమన్ జోత్ కౌర్ తోడ్పాడుతో భారత మహిళల క్రికెట్ జట్టుకు చిరస్మరణీయ గెలుపును అందించింది. భారత మహిళా క్రికెట్ జట్టు చరిత్రలోనే అద్భుతమైన విజయాన్ని కళ్ళముందు సాక్షాత్కరింప జేసిన జెమీమా మ్యాచ్ ముగిసిన తర్వాత ఆనంద భాష్పాలను కురిపించింది.ఆమెలో నిగూడంగా గూడు కట్టుకున్న ఆవేదనకు అది అద్దం పట్టింది. చావో రేవో తేల్చుకోవాల్సిన ఆస్ట్రేలియా- భారత మ్యాచులో ఆస్ట్రేలియాను చిత్తు చేసి అజేయంగా 175 పరుగులతో నిలిచిన జెమీమా రోడ్రిగ్స్ ప్రస్తుతం భారతమహిళల క్రికెట్టు జట్టుకు ముఖ్య క్రీడాకారిణిగా అవతరించింది. నేడు జరిగే ఫైనల్ లో కూడా చెలరేగితే ఇక ప్రపంచ మహిళా క్రికెట్టు కప్పు మన దేశానిదేనని మనస్ఫూర్తిగా అనుకోవచ్చు.