China లోని హెబెయ్‌ ప్రావిన్స్‌ను ముంచెత్తిన వరదలు - 29 మంది మృతి, 16 మంది గల్లంతు

హెబెయ్‌, ఆగష్టు 11  (ఇయ్యాల తెలంగాణ) :  భారీ వర్షాల కారణంగా చైనాలోని హెబెయ్‌ ప్రావిన్స్‌ను వరదలు ముంచెత్తాయి. ఈ వరదల వల్ల ప్రావిన్స్‌లోని లోతట్టు ప్రాంతాలకు తీవ్ర నష్టం వాటిల్లింది. మొత్తం 29 మంది ప్రాణాలు కోల్పోయారు. మరో 16 మంది గల్లంతయ్యారు. ఈ ప్రకృతి విపత్తు హెబెయ్‌ ప్రావిన్స్‌కు 95.811 బిలియన్‌ యువాన్‌ల నష్టాన్ని మిగిల్చిందని అధికారులు తెలిపారు.గత కొన్ని రోజులుగా ఎడతెరపి లేకుండా వర్షాలు కురుస్తుండటంతో హెబెయ్‌ ప్రావిన్స్‌లో వరదలు పోటెత్తాయని చైనా ఆర్థికమంత్రి చెప్పారు. ఈ ప్రకృతి విపత్తును ఎదుర్కోవడానికి అదనంగా 1.46 బిలియన్‌ యువాన్‌లను ఆర్థిక సాయంగా అందించినట్లు ఆయన తెలిపారు. వివిధ వరద ప్రభావిత రీజయన్లలో పునరావాస చర్యల కోసం ప్రభుత్వం ఇప్పటికే 7.738 బిలియన్‌ల నిధులను మంజూరు చేసిందని, తాజా నిధులు అందుకు అదనమని పేర్కొన్నారు.